ایف بی آر کے اختیارات برقرار، ڈینٹل اور میڈیکل کالجز کی درخواستیں مسترد

اسلام آباد ہائی کورٹ نے انکم ٹیکس آرڈیننس 2001 کے سیکشن 175 کے تحت فیڈرل بورڈ آف ریونیو (ایف بی آر) کے تحقیقاتی اور قانونی نفاذ کے اختیارات کو قانونی طور پر درست قرار دیتے ہوئے واٹم ڈینٹل کالج اور واٹم میڈیکل کالج کی آئینی درخواستیں مسترد کر دی ہیں۔ جسٹس راجہ انعام امین منہاس اور جسٹس شاہ رخ ارجمند پر مشتمل ڈویژن بینچ نے فیصلہ سناتے ہوئے قرار دیا کہ ایف بی آر کے لیے سیکشن 175 کے تحت کارروائی اور وزٹ کی اجازت کے لیے پہلے سے کوئی اسیسمنٹ یا آڈٹ کارروائی کا زیر التوا ہونا لازمی نہیں ہے۔ عدالت کے مطابق ڈائریکٹوریٹ کے پاس اسیسمنٹ کا اختیار نہ ہونا اس کے تحقیقاتی دائرہ کار پر اثر انداز نہیں ہوتا۔ واضح رہے کہ واٹم ڈینٹل کالج نے ٹیکس سال 2020 سے 2023 کے دوران بینک اکاؤنٹس میں 1 ارب 53 کروڑ روپے سے زائد رقم کی وصولی کے باوجود انکم ٹیکس ریٹرنز صفر جمع کرائے تھے، جس پر ایف بی آر کی تحقیقاتی کارروائی کے خلاف انہوں نے عدالت سے رجوع کیا تھا۔