تین سال میں سندھ حکومت نے 10 لاکھ گھر بنا کر تاریخ رقم کردی: بلاول بھٹو

پاکستان پیپلز پارٹی کے چیئرمین بلاول بھٹو زرداری نے کراچی میں سیلاب متاثرین کے گھروں کی تکمیل کی تقریب سے خطاب کرتے ہوئے کہا ہے کہ سندھ حکومت نے 3 سال کے قلیل عرصے میں 10 لاکھ گھر بنا کر ایک نئی تاریخ رقم کر دی ہے۔ انہوں نے کہا کہ عالمی معاشی بحران اور تاریخی مہنگائی کے دور میں عوام کو سیاسی محاذ آرائی، نفرت اور تقسیم کی سیاست نہیں بلکہ اپنے مسائل کا حل چاہیے۔ بلاول بھٹو نے واضح کیا کہ 1970ء کے بعد زمین کی منتقلی کا یہ سب سے بڑا منصوبہ ہے جس میں نہ صرف بے گھر افراد کو چھت فراہم کی گئی بلکہ دیہی خواتین کو زمین کے مالکانہ حقوق بھی دیے گئے۔ انہوں نے کہا کہ وفاقی اداروں کی جانب سے رکاوٹوں کے باوجود عالمی بینک نے سندھ حکومت پر اعتماد کیا جسے صوبائی حکومت نے پورا کر دکھایا۔ پی پی پی چیئرمین نے اعادہ کیا کہ 10 لاکھ گھروں کا مرحلہ مکمل ہونے کے بعد اب 20 لاکھ گھروں کی تعمیر کا ہدف بھی حاصل کیا جائے گا۔