صدر اور وزیراعظم کا دیوالی پر ملک میں اتحاد، مذہبی ہم آہنگی کے فروغ پر زور

صدر مملکت آصف علی زرداری اور وزیراعظم محمد شہباز شریف نے ہندو برادری کے مذہبی تہوار ‘دیوالی’ کے پرمسرت موقع پر پاکستان اور دنیا بھر میں مقیم ہندو برادری کو دلی مبارکباد پیش کرتے ہوئے ملک میں مساوی شہریت، مذہبی ہم آہنگی اور بین المذاہب رواداری کے فروغ پر زور دیا ہے۔ صدر آصف علی زرداری نے اپنے پیغام میں کہا کہ ہندو برادری قومی زندگی کا لازمی حصہ ہے اور ان کا تعلیم، صحت، اور معیشت سمیت مختلف شعبوں میں گراں قدر کردار ہے۔ انہوں نے واضح کیا کہ قائدِ اعظم کے تصور کے مطابق تمام شہریوں کا ملک پر یکساں حق ہے اور کسی کو مذہب کی بنیاد پر اپنی وطن سے وابستگی ثابت کرنے کی ضرورت نہیں۔ دوسری جانب وزیراعظم شہباز شریف نے کہا کہ دیوالی کا تہوار نفرت اور مایوسی کے اندھیروں پر روشنی کی فتح کا پیغام دیتا ہے اور پاکستان کو اپنی مذہبی و ثقافتی تنوع پر فخر ہے۔ انہوں نے آئین کے مطابق اقلیتوں کی مذہبی آزادیوں، وقار اور حقوق کے تحفظ کے کامل عزم کا اعادہ کرتے ہوئے پرامن، جامع اور خوشحال معاشرے کی تشکیل کے لیے مشترکہ کاوشوں پر زور دیا۔