پاکستان ہاکی فیڈریشن کا ملک بھر میں اسکولز ہاکی لیگ شروع کرنےکا فیصلہ

پاکستان ہاکی فیڈریشن (پی ایچ ایف) نے قومی کھیل کی بحالی اور اسکول کی سطح سے نیا ٹیلنٹ سامنے لانے کے لیے ملک گیر ‘اسکولز ہاکی لیگ’ کے انعقاد کا بڑا فیصلہ کیا ہے۔ لیگ کے ضلعی، تحصیل اور ڈویژنل مقابلے 15 نومبر سے شروع ہوں گے، جبکہ صوبائی مقابلے جنوری اور قومی راؤنڈ فروری میں ہوگا جس میں چاروں صوبوں، آزاد کشمیر، گلگت بلتستان اور اسلام آباد کے اسکولز شرکت کریں گے۔ پی ایچ ایف کے مطابق الگ سی ای او کے تحت چلنے والی اس لیگ میں پہلی تین پوزیشنیں حاصل کرنے والے کھلاڑیوں کو بالترتیب 10 ہزار، 7 ہزار 5 سو اور 5 ہزار روپے ماہانہ وظیفہ ایک سال تک دیا جائے گا۔ اس کے علاوہ فاتح ٹیم اور منتخب کھلاڑی بین الاقوامی دورے کریں گے، جبکہ ہر سال 100 لڑکوں اور 100 لڑکیوں کو سمر کیمپس کے ذریعے کوچنگ، فٹنس ٹریننگ اور تعلیمی ٹیوشن بھی فراہم کی جائے گی۔