اسرائیلی الیکشن: مقبوضہ مغربی کنارے کی تمام زمینی گزر گاہیں بند، نقل و حرکت پر پابندی

اسرائیلی فوج نے انتخابات کے موقع پر مقبوضہ مغربی کنارے (West Bank) کی تمام اہم زمینی گزرگاہیں مکمل طور پر بند کرنے اور فلسطینی شہریوں و محنت کشوں کی نقل و حرکت پر سخت ترین نئی پابندیاں عائد کرنے کا باضابطہ اعلان کیا ہے۔

صیہونی عسکری حکام کے مطابق زیادہ تر فلسطینی کارکنوں کو اسرائیلی بستیوں اور صنعتی علاقوں میں داخل ہونے سے روک دیا گیا ہے، جبکہ انتہائی محدود حالات میں چند استثنائی اجازت نامے برقرار رہیں گے۔ اسرائیلی فوج کا کہنا ہے کہ یہ سخت ترین اقدامات 2 اسرائیلی فوجیوں کی ہلاکت کے بعد شروع کیے گئے وسیع پیمانے کے ملٹری آپریشن کا حصہ ہیں، جس میں 2 مسلح فلسطینی بھی مارے گئے تھے۔

دوسری جانب مقبوضہ مغربی کنارے کے تاریخی اور بڑے شہر الخلیل (Hebron) میں اسرائیلی فوج کی جارحانہ عسکری کارروائی بلا تعطل جاری ہے۔ مقامی انتظامیہ اور بلدیاتی حکام کے مطابق اس کارروائی کے دوران تقریباً 2,200 فلسطینی شہری بے گھر ہو چکے ہیں، جبکہ متعدد رہائشی مکانات اور تجارتی عمارتوں کو شدید نقصان پہنچا ہے۔ اکثر متاثرہ افراد نے شیلٹرز اور رشتہ داروں کے گھروں میں عارضی طور پر پناہ لے رکھی ہے۔