خلیجی ممالک میں کشیدگی کے باعث فضائی آپریشن ایک بار پھر متاثر

سعودی عرب سمیت دیگر خلیجی ممالک میں بڑھتی ہوئی کشیدگی اور سکیورٹی خدشات کے باعث پاکستان کا فضائی آپریشن ایک بار پھر شدید متاثر ہوا ہے۔ ایئرپورٹ ذرائع کے مطابق ملک بھر کے مختلف ایئرپورٹس سے مجموعی طور پر 42 پروازیں منسوخ کر دی گئی ہیں جبکہ 68 پروازیں دو سے سات گھنٹے تک کی تاخیر کا شکار ہیں، جس کے باعث ہزاروں مسافروں اور خصوصاً عمرہ زائرین کو شدید مشکلات کا سامنا کرنا پڑ رہا ہے۔ لاہور کے علامہ اقبال انٹرنیشنل ایئرپورٹ پر 13 پروازیں منسوخ اور 12 تاخیر کا شکار ہوئیں، کراچی سے 10 پروازیں منسوخ اور 13 تاخیر کی زد میں آئیں، اسلام آباد ایئرپورٹ پر 9 پروازیں منسوخ اور 8 تاخیر کا شکار ہوئیں، جبکہ ملتان ایئرپورٹ سے بھی 7 پروازیں منسوخ کی گئی ہیں۔