خیبرپختونخوا میں مارخور ٹرافی ہنٹنگ پرمٹس کی نیلامی سے ریکارڈ آمدن

خیبرپختونخوا میں مارخور ٹرافی ہنٹنگ پرمٹس کی سالانہ نیلامی سے ریکارڈ آمدن حاصل ہوئی ہے۔ چترال اور کوہستان میں ہونے والی اس نیلامی سے مجموعی طور پر 12 لاکھ 11 ہزار 800 امریکی ڈالر (تقریباً 34 کروڑ پاکستانی روپے) حاصل ہوئے ہیں، جو گزشتہ سال کے مقابلے میں 2 لاکھ 66 ہزار ڈالر (ساڑھے 7 کروڑ روپے) زیادہ ہیں۔ نیلامی کے دوران توشی ون چترال کا پرمٹ 3 لاکھ 20 ہزار 600 ڈالر، توشی ٹو کا پرمٹ 3 لاکھ 35 ہزار 600 ڈالر، گہریت گول کا پرمٹ 2 لاکھ 60 ہزار ڈالر جبکہ کیگاہ کھوار کوہستان کا پرمٹ 2 لاکھ 95 ہزار 600 ڈالر میں فروخت ہوا۔ محکمہ جنگلی حیات کے مطابق اس آمدن کا 80 فیصد حصہ مقامی کمیونٹی کو دیا جائے گا تاکہ انہیں جنگلی حیات اور قدرتی وسائل کے تحفظ پر مالی طور پر فائدہ پہنچایا جا سکے، جبکہ باقی 20 فیصد سرکاری خزانے میں جمع ہوگا۔