برطانیہ کا اپنے شہریوں کو سعودی ایئرپورٹس کی طرف سفر نہ کرنے کا مشورہ

برطانوی دفتر خارجہ (FCDO) نے کشیدہ علاقائی سیکیورٹی صورتحال کے پیشِ نظر اپنے شہریوں کے لیے نئی ٹریول ایڈوائزری جاری کرتے ہوئے سعودی عرب کے جنوبی صوبوں عسیر، نجران، جیزان اور طائف شہر بمعہ اس کے ایئرپورٹ کا غیر ضروری سفر نہ کرنے کی ہدایت کی ہے۔ برطانوی حکام نے شہریوں کو یہ مشورہ بھی دیا ہے کہ وہ یمن کی سرحد سے 10 کلومیٹر کے اندر واقع کسی بھی علاقے میں جانے سے مکمل طور پر گریز کریں۔

برطانوی دفتر خارجہ کا یہ الرٹ یمن کے حوثی باغیوں کی جانب سے سعودی دارالحکومت ریاض کے کنگ خالد انٹرنیشنل ایئرپورٹ پر بیلسٹک میزائل حملے کے دعوے اور اس کے نتیجے میں متعدد ایئرلائنز کا آپریشن معطل ہونے کے بعد سامنے آیا ہے۔ دوسری جانب سعودی سول ڈیفنس نے تصدیق کی ہے کہ ریاض کی فضائی حدود میں بیلسٹک میزائل کو کامیابی سے انٹرسیپٹ کر کے تباہ کیا گیا، تاہم میزائل کا جلتا ہوا ملبہ رہائشی علاقے میں گرنے سے بچوں کی ایک نرسری اور ایک میڈیکل کمپلیکس کی عمارتوں کو جزوی نقصان پہنچا ہے۔