شام کا سعودی عرب کی درخواست پر یمن میں فوج بھیجنے پر غور

امریکی نیوز ویب سائٹ ‘ایگزیوس’ اور برطانوی خبر رساں ایجنسی کی رپورٹ کے مطابق، شام سعودی عرب کی خصوصی درخواست پر یمن میں ممکنہ فوجی تعاون کے مختلف آپشنز پر سنجیدگی سے غور کر رہا ہے۔ رپورٹس کے مطابق زیرِ غور تجاویز میں دفاعی تعاون سے لے کر حوثیوں کے خلاف برسرِ پیکار یمنی فورسز کی مدد کے لیے شامی اہلکاروں کی ممکنہ تعیناتی تک کے اقدامات شامل ہیں۔

ایک امریکی اہلکار نے تصدیق کی ہے کہ ریاض نے دمشق سے حوثیوں کے خلاف جنگ میں تعاون کا مطالبہ کیا ہے، جبکہ شام کے عبوری سربراہ احمد الشرع نے حال ہی میں ریاض کا دورہ کیا تھا جہاں ان کی سعودی ولی عہد شہزادہ محمد بن سلمان سے اہم ملاقات ہوئی۔ تین امریکی حکام کے مطابق شامی صدر احمد الشرع اس سعودی درخواست پر سنجیدگی سے غور کر رہے ہیں اور امکان ہے کہ وہ اسے قبول کر لیں گے۔ دوسری جانب شامی سفارت کاروں کا کہنا ہے کہ شام اس وقت اپنی اندرونی بحالی پر گامزن ہے، تاہم کسی بھی ممکنہ فوجی تعاون یا مہارت کے تبادلے کی صورت میں دونوں ممالک کے دوطرفہ معاہدوں کے تحت عمل کیا جائے گا۔ دفاعی تجزیہ کاروں کے مطابق شام کی کسی بھی ممکنہ شمولیت سے اس علاقائی تنازع کے اثرات مزید پیچیدہ ہو سکتے ہیں