روس کے یوکرین پر میزائل اور ڈرون حملے، بچوں سمیت 28 افراد ہلاک

روس نے یوکرین کے مختلف علاقوں پر رات بھر شدید میزائلوں اور درجنوں ڈرونز کے ذریعے زبردست حملہ کیا ہے، جس کے نتیجے میں بچوں سمیت کم از کم 28 افراد ہلاک اور 100 سے زائد شدید زخمی ہو گئے ہیں۔ یوکرینی حکام کے مطابق اس مربوط حملے نے شہری آبادی اور رہائشی عمارتوں کو شدید نقصان پہنچایا ہے۔

یوکرین کے صدر ولادیمیر زیلنسکی نے ان حملوں کو حالیہ تمام کارروائیوں میں سب سے زیادہ سفاکانہ قرار دیتے ہوئے بتایا کہ روس نے ایک ہی رات میں 70 سے زائد بیلسٹک اور کروز میزائل اور درجنوں شاہد ڈرونز داغے۔ زیلنسکی نے خبردار کیا کہ روسی بیلسٹک میزائل دفاعی نظام کے لیے سب سے بڑا چیلنج بن چکے ہیں، تاہم یوکرینی دفاعی فورسز نے بیشتر ڈرونز کو فضا میں ہی تباہ کر دیا۔ دوسری جانب روسی وزارتِ دفاع نے حملوں کی تصدیق کرتے ہوئے دعویٰ کیا ہے کہ انہوں نے صرف یوکرین کی عسکری تنصیبات اور دفاعی صلاحیتوں کو نشانہ بنایا ہے۔