افغانستان میں تبدیلی ناگزیر اور بہت قریب ہے،گلبدین حکمت یار

افغانستان کے سابق وزیراعظم اور حزبِ اسلامی کے سربراہ گلبدین حکمت یار نے افغان طالبان کی موجودہ حکومت پر سخت تنقید کرتے ہوئے ملک میں فوری طور پر اقتدار عوام کے منتخب نمائندوں کو منتقل کرنے کا مطالبہ کر دیا ہے। حامیوں سے آن لائن خطاب میں ان کا کہنا تھا کہ افغانستان میں سیاسی تبدیلی ناگزیر اور انتہائی قریب ہے، کیونکہ جس طرح ماضی میں سوویت یونین اور امریکہ کی زیرِ سرپرستی قائم ہونے والی حکومتیں زیادہ دیر قائم نہ رہ سکیں، اسی طرح طالبان کا موجودہ نظام بھی زیادہ عرصے نہیں چل سکے گا۔

گلبدین حکمت یار نے کہا کہ قومی و خارجہ پالیسی، بجٹ، اور جنگ و امن سے متعلق تمام اہم فیصلے منتخب اداروں اور عوامی کونسل کے ذریعے ہی کیے جانے چاہئیں۔ طالبان کو متنبہ کرتے ہوئے انہوں نے کہا کہ جب آپ اپنے مخالفین کو برداشت نہیں کر سکتے اور ان کے لیے ملک میں کوئی جگہ نہیں چھوڑتے، تو پھر یہی اصول آپ پر بھی لاگو ہوتا ہے۔ سابق وزیراعظم نے نشاندہی کی کہ طالبان حکومت شدید سیاسی تنہائی کا شکار ہے اور اس کے سابقہ حامی ممالک بھی اب ان کے ساتھ مکمل ہم آہنگ نہیں ہیں، جبکہ افغان عوام اس وقت شدید بے روزگاری، بدامنی اور غربت جیسے سنگین مسائل کی چکی میں پس رہے ہیں۔