قطر کے قریب آئل ٹینکر پر متعدد پروجیکٹائلز سے حملہ، ہلاکتوں کا خدشہ

قطر کے شمالی ساحل کے قریب کھلے سمندر میں ایک آئل ٹینکر کو متعدد پروجیکٹائلز سے نشانہ بنائے جانے کی شدید اطلاعات موصول ہوئی ہیں۔ برطانوی میری ٹائم ٹریڈ آپریشنز (UKMTO) کے مطابق یہ واقعہ قطر کے ساحل سے تقریباً 51 ناٹیکل میل کی دور پر پیش آیا، جس کے نتیجے میں آئل ٹینکر کو نقصان پہنچا ہے۔

برطانوی ایجنسی نے خدشہ ظاہر کیا ہے کہ اس حملے کے نتیجے میں جہاز کے عملے کے بعض افراد زخمی یا ہلاک ہو سکتے ہیں، تاہم ہلاکتوں یا زخمیوں کی حتمی تعداد اور ان کی قومیتی شناخت کے حوالے سے تفصیلات منظرِ عام پر نہیں آئی ہیں۔ فی الوقت متاثرہ آئل ٹینکر کا نام اور ملک کا اندراج بھی ظاہر نہیں کیا گیا ہے، جبکہ سمندری حدود میں سیکیورٹی اور ریسکیو ادارے واقعے کی مکمل تحقیقات میں مصروف ہیں۔