ایران مذاکرات کے ساتھ مزاحمت اور استقامت کا سلسلہ بھی جاری رکھے گا، مسعود پزشکیان

ایران کے صدر مسعود پزشکیان نے اپنے حالیہ خطاب میں واضح کیا ہے کہ ایران اپنے عوام کے حقوق اور قومی مفادات کے تحفظ کے لیے سفارتی مذاکرات کے ساتھ ساتھ مزاحمت اور استقامت کا سلسلہ بھی بدستور جاری رکھے گا۔

کابینہ کے اجلاس سے خطاب کرتے ہوئے ایرانی صدر نے کہا کہ ملک کو اس وقت تمام شعبوں میں ایک ہمہ گیر جنگ اور مختلف چیلنجز کا سامنا ہے، تاہم ایران مکمل وقار، خودداری اور طاقت کے موقف پر قائم رہتے ہوئے مذاکراتی عمل آگے بڑھائے گا۔ صدر مسعود پزشکیان نے قومی اتحاد اور داخلی یکجہتی کو دشمن کے سازشی عناصر اور اقتصادی و سیاسی چیلنجز کا مقابلہ کرنے کے لیے بنیادی شرط قرار دیا۔ انہوں نے مزید کہا کہ پڑوسی ممالک کے ساتھ کثیرالجہتی تعلقات اور دوطرفہ تعاون میں اضافہ ایران کی خارجہ پالیسی کی اہم ترجیح ہے، تاہم تمام تر توجہ ملکی صلاحیتوں اور قومی یکجہتی پر ہی مرکو ز رہے گی۔