سعودی عرب کے 2 ہوائی اڈوں پر حوثیوں کے حملے، 3 افراد جاں بحق، 36 زخمی

سعودی عرب کے ابہا انٹرنیشنل ایئرپورٹ اور دارالحکومت ریاض کے کنگ خالد انٹرنیشنل ایئرپورٹ پر یمن کے حوثی باغیوں کی جانب سے کیے گئے ڈرون اور میزائل حملوں کے نتیجے میں غیر ملکی شہریوں سمیت 3 افراد جاں بحق اور 36 افراد زخمی ہو گئے ہیں۔

سعودی سول ایوی ایشن کے مطابق صوبہ عسیر کے ابہا ایئرپورٹ پر حملے کے دوران مراکش اور الجزائر کی 2 خواتین جاں بحق جبکہ بنگلہ دیش اور فلپائن کے شہریوں سمیت 28 افراد زخمی ہوئے۔ دوسری جانب ریاض کے کنگ خالد انٹرنیشنل ایئرپورٹ پر ہوئے حملے میں سوڈانی شہری جاں بحق اور ایک پاکستانی اور 2 مصری شہریوں سمیت 8 افراد زخمی ہوئے۔ حملوں سے دونوں ہوائی اڈوں کے بنیادی ڈھانچے کو بھی نقصان پہنچا۔ عرب فوجی اتحاد کے ترجمان میجر جنرل ترکی المالکی کے مطابق سعودی افواج نے جوابی کارروائی کرتے ہوئے ریاض پر حملے کے لیے استعمال ہونے والا بیلسٹک میزائل لانچر تباہ کر دیا ہے۔