اپوزیشن جان بوجھ کر مذاکرات کی ناکامی کا ملبہ ڈال رہی ہے، وزیراعلیٰ کے پی کی آخری وقت کی شرائط نے مذاکرات ناکام بنائے: حکومتی مؤقف

وزیر مملکت برائے داخلہ طلال چوہدری نے اسلام آباد میں پریس کانفرنس کرتے ہوئے کہا ہے کہ اپوزیشن مذاکرات کے حوالے سے حقائق چھپا رہی ہے اور جان بوجھ کر مذاکرات کو نتیجہ خیز نہیں بننے دیا۔ انہوں نے انکشاف کیا کہ مذاکرات کے پہلے روز دہشت گردی اور سیاسی امور کے بنیادی نکات پر مکمل اتفاق رائے ہو چکا تھا اور تمام معاملات درست سمت میں آگے بڑھ رہے تھے، تاہم آخری مرحلے میں اپوزیشن نے وزیراعلیٰ خیبرپختونخوا سے رابطہ کیا جس کے بعد اچانک شرائط سامنے رکھ دی گئیں۔ طلال چوہدری نے واضح کیا کہ نیشنل ایکشن پلان کسی ایک صوبے یا جماعت کا نہیں بلکہ پورے پاکستان کی سلامتی کا ضامن ہے، اور حکومت کے لیے ملکی سلامتی اور دہشت گردی کا خاتمہ ہر سیاسی مفاد سے مقدم ہے۔