عراقی شہر کرکوک میں داعش کے حملے، ایک پولیس اہلکار ہلاک، 4 زخمی

عراق کے تیل سے مالا مال شمالی شہر کرکوک کے قریب دہشت گرد تنظیم ’داعش‘ (ISIS) کے جنگجوؤں کے ایک حملے میں ایک عراقی پولیس اہلکار ہلاک جبکہ دیگر چار شدید زخمی ہو گئے ہیں۔ سیکیورٹی ذرائع کے مطابق یہ حملہ کرکوک سے تقریباً 70 کلومیٹر جنوب مغرب میں واقع حویجہ کے قریب پولیس چیک پوسٹ پر کیا گیا، جہاں حملہ آوروں نے نیم خودکار مشین گنوں اور اسنائپر فائر کا استعمال کیا۔

اگرچہ کسی گروپ نے باضابطہ طور پر فوری ذمہ داری قبول نہیں کی، تاہم عراقی سیکیورٹی و فوجی حکام نے علاقے میں متحرک داعش کے سلیپر سیلز کو اس کارروائی کا ذمہ دار قرار دیا ہے۔ 30 ستمبر کو عراق سے امریکی و اتحادی افواج کے مکمل انخلا اور فوجی مشن کے اختتام کے بعد عراقی فورسز پر داعش کا یہ پہلا بڑا رپورٹ شدہ حملہ ہے۔ واشنگٹن نے انخلا کے باوجود عراقی فورسز کو محدود سطح پر انٹیلی جنس اور تربیت کا تعاون جاری رکھنے کا اعلان کر رکھا ہے۔