تیل کے ذخائر خطرناک حد تک کم ہوگئے، آرامکو سربراہ کا انتباہ

سعودی عرب کی قومی آئل کمپنی آرامکو کے سربراہ اور چیف ایگزیکٹو آفیسر امین ناصر نے خبردار کیا ہے کہ مشرقِ وسطیٰ میں جاری جنگ اور آبنائے ہرمز میں شدید کشیدگی کے باعث عالمی سطح پر تیل کے تجارتی اور اسٹریٹجک ذخائر خطرناک حد تک کم ہو چکے ہیں۔ لندن میں منعقدہ ’2026ء انرجی انٹیلی جنس فورم‘ سے خطاب کرتے ہوئے انہوں نے واضح کیا کہ عالمی توانائی کا نظام اس وقت شدید دباؤ کا شکار ہے اور آبنائے ہرمز مکمل طور پر بحال ہونے اور مارکیٹ کا اعتماد بحال ہونے تک دنیا مزید کسی بھی سپلائی کے جھٹکے کو برداشت کرنے کی پوزیشن میں نہیں ہے۔

امین ناصر نے انکشاف کیا کہ امریکا، اسرائیل اور ایران کے درمیان سات ماہ سے جاری اس کشیدگی کے نتیجے میں خطے سے تقریباً 3 ارب بیرل تیل کی معمول کی سپلائی متاثر ہوئی ہے۔ اس خسارے کو پورا کرنے کے لیے دنیا بھر کے تجارتی ذخائر سے ایک ارب بیرل سے زائد اور حکومتوں کے اسٹریٹجک ریزرو (SPR) سے 30 کروڑ بیرل سے زائد تیل مارکیٹ میں لایا گیا۔ انہوں نے بتایا کہ اس وقت دنیا میں تجارتی بنیادوں پر موجود 6 ارب بیرل سے کم ذخائر کا صرف 10 فیصد حصہ ہی واقعی فوری طور پر دستیاب ہے۔ آرامکو سربراہ نے خبردار کیا کہ ہنگامی ذخائر جاری کرنا عارضی تدبیر ہے جو بنیادی عدم توازن ختم نہیں کر سکتی، اور ان ذخائر کو دوبارہ معمول کی سطح پر لانے کے لیے کم از کم دو سال کا عرصہ درکار ہوگا۔