7 اکتوبر کے حملے ہماری ناکامی تھے، سبق سیکھنا ہوگا: سربراہ اسرائیلی فوج

اسرائیلی فوج کے چیف آف اسٹاف لیفٹیننٹ جنرل ایال زامیر نے 7 اکتوبر 2023ء کے حملے کو عسکری اور دفاعی سطح پر اپنی فوج کی شدید ناکامی قرار دیتے ہوئے کہا ہے کہ مسلح افواج کو ان تاریخی ناکامیوں سے سبق سیکھنا ہوگا۔ اپنے ایک باضابطہ بیان میں لیفٹیننٹ جنرل ایال زامیر نے اعتراف کیا کہ 7 اکتوبر 2023ء کا دن اسرائیلی فوج کے لیے ایک گہری اور ناقابلِ تردید ناکامی کا دن تھا۔ انہوں نے انکشاف کیا کہ 7 اکتوبر کے واقعات سے متعلق فوج کی جانب سے کی جانے والی تمام اندرونی و عسکری تحقیقات مکمل کر لی گئی ہیں اور ان رپورٹس سے تباہی اور ناکامی کی حقیقی شدت کا واضح اندازہ ہوا ہے۔

لیفیٹیننٹ جنرل ایال زامیر نے اس بات پر زور دیا کہ اب وقت آگیا ہے کہ ماضی کی غلطیوں اور ناکامیوں میں الجھنے کے بجائے ان سے حاصل ہونے والے اسباق پر عمل کیا جائے۔ انہوں نے کہا کہ عسکری شعبے میں بنیادی اصلاحات کا فوری نفاذ اور آئندہ کے لیے سیکورٹی نظام کو مضبوط بنا کر آگے بڑھنا ہی افواج کے لیے سب سے اہم اور ضروری قدم ہے۔