ایران نے اپنے سفارتکاروں کو امریکا سے نکالے جانے کا دعویٰ مسترد کر دیا

ایران نے امریکی انتظامیہ کی جانب سے ایرانی سفارت کاروں کو امریکا سے نکالے جانے کے دعوے کو مکمل طور پر مسترد کر دیا ہے۔ ایرانی وزیرِ خارجہ عباس عراقچی نے ایک بیان میں واضح کیا کہ اقوامِ متحدہ کی جنرل اسمبلی کے اجلاس میں شرکت کے لیے جانے والے تمام ایرانی سفارت کار اپنے پہلے سے طے شدہ شیڈول کے مطابق امریکا سے واپس روانہ ہوئے تھے۔ عباس عراقچی نے امریکی موقف کو ”جعلی سفارتی بے دخلی“ قرار دیتے ہوئے کہا کہ ایسے بے بنیاد دعوے پر فخر کرنا کسی بھی ملک کے اعلیٰ سفارتی عہدیدار کے شایانِ شان نہیں، بلکہ یہ امریکی حکام کی سفارتی مایوسی اور شکست کا واضح اظہار ہے۔

ایرانی وزیرِ خارجہ نے مزید کہا کہ اس قسم کا رویہ اور دعوے اقوامِ متحدہ کے میزبان ملک کی حیثیت سے امریکا کی بین الاقوامی ذمہ داریوں سے بھی مطابقت نہیں رکھتے۔ اس سے قبل امریکی میڈیا ادارے ‘ایگزیوس’ نے ایک سینئر امریکی عہدیدار کے حوالے سے دعویٰ کیا تھا کہ اقوامِ متحدہ کی جنرل اسمبلی کے اجلاس کے اختتام کے بعد بھی نیویارک میں موجود رہنے پر ایرانی وفد کے دو ارکان کو امریکا سے نکال دیا گیا تھا، اور امریکی وزیرِ خارجہ مارکو روبیو نے انہیں فوری طور پر ملک چھوڑنے کے احکامات جاری کیے تھے۔