یمن میں حوثیوں کے خلاف ملک گیر فوجی آپریشن شروع کرنے کا اعلان

یمن کی بین الاقوامی طور پر تسلیم شدہ صدارتی لیڈرشپ کونسل کے سربراہ رشاد العلیمی نے حوثی باغیوں کے خلاف ملک گیر سطح پر وسیع فوجی آپریشن شروع کرنے کا باضابطہ اعلان کر دیا ہے۔ قوم سے ٹیلی ویژن پر خطاب کرتے ہوئے رشاد العلیمی نے بتایا کہ اس کارروائی کا بنیادی مقصد حوثیوں کے زیرِ تسلط تمام یمنی علاقوں کو آزاد کروانا اور ملک بھر میں آئینی ریاست اور اس کے اداروں کی عملداری دوبارہ بحال کرنا ہے۔ انہوں نے واضح کیا کہ حوثیوں کے خلاف یہ حتمی فوجی اقدام پرامن حل، سیاسی مذاکرات اور کشیدگی میں کمی کے تمام تر راستے مسدود ہونے کے بعد اٹھایا جا رہا ہے۔

خطاب کے دوران رشاد العلیمی نے حوثیوں کے کنٹرول والے علاقوں کی عوام سے قومی مسلح افواج کے ساتھ مکمل تعاون کی اپیل کی۔ انہوں نے عزم ظاہر کیا کہ جن شہروں اور علاقوں کو حوثیوں سے واگزار کرایا جائے گا، وہاں فوری طور پر بنیادی ڈھانچے کی بحالی اور تعمیرِ نو کا کام شروع کر دیا جائے گا۔ اس کے ساتھ ہی انہوں نے حوثی جنگجوؤں کے لیے عام معافی کی پیشکش کرتے ہوئے کہا کہ ہتھیار ڈالنے والے ہر شخص کو محفوظ واپسی اور امن کی ضمانت دی جائے گی۔