دفاعی معاہدے میں ایران، فلسطین اور دیگر اسلامی ممالک کو شامل کیا جائے: حافظ نعیم الرحمان

امیر جماعت اسلامی حافظ نعیم الرحمان نے شہرِ قائد میں کارکنان سے گفتگو کرتے ہوئے مطالبہ کیا ہے کہ کسی بھی دفاعی معاہدے میں ایران، فلسطین اور دیگر اسلامی ممالک کو لازمی طور پر شامل کیا جائے۔ انہوں نے دوٹوک الفاظ میں کہا کہ اسرائیل کی غیرقانونی ریاست کسی صورت قبول نہیں ہے اور فلسطین و مسجد اقصیٰ کی آزادی کے لیے امت مسلمہ کو اپنی جدوجہد تیز کرنا ہوگی۔ حافظ نعیم الرحمان نے غزہ میں اسرائیلی بمباری اور جنگ بندی کی خلاف ورزیوں کی شدید مذمت کرتے ہوئے کہا کہ امریکا کی جانب سے اسرائیل کو اربوں ڈالر کا اسلحہ فراہم کیا جا رہا ہے جبکہ ہزاروں افراد ملبے تلے دبے ہیں۔ انہوں نے اس عزم کا اظہار کیا کہ جماعت اسلامی اور الخدمت فاؤنڈیشن نے ہمیشہ مظلوم فلسطینیوں کی بھرپور مدد کی ہے اور یہ جدوجہد جاری رہے گی۔