یوکرین کا حملوں کی صورت روسی آئل ریفائنریوں کو نشانہ بنانے کا عمل مزید تیز کرنے کا اعلان

یوکرینی صدر وولودیمیر زیلنسکی نے کہا ہے کہ روس کی جانب سے کیف اور دیگر اہم شہروں پر فضائی حملوں کی نئی حکمتِ عملی کے جواب میں یوکرین روسی آئل ریفائنریوں اور توانائی کے شعبے کو نشانہ بنانے کا عمل مزید تیز کرے گا، تاہم اس دوران کسی بھی شہری آبادی یا تنصیبات کو نشانہ نہیں بنایا جائے گا۔ صدر زیلنسکی نے انکشاف کیا کہ یوکرینی انٹیلی جنس کو ایسی دستاویزات موصول ہوئی ہیں جن کے مطابق صدر پیوٹن نے موسمِ سرما سے قبل اسکولوں، ہسپتالوں، سڑکوں اور لاجسٹکس انفراسٹرکچر پر حملوں کی منظوری دی ہے تاکہ شہریوں کو نقل مکانی پر مجبور کیا جا سکے۔

انہوں نے بتایا کہ یوکرین روس کی ان آئل ریفائنریوں کو خاص طور پر نشانہ بنائے گا جو ماسکو کے جنگی اخراجات کا ذریعہ ہیں۔ زیلنسکی کا کہنا تھا کہ یوکرینی جوابی کارروائی کے دوران ڈونباس میں 140 مربع کلومیٹر علاقہ واپس چھین لیا گیا ہے۔ انہوں نے مزید کہا کہ یوکرین کو جیٹ انجن والے نئے شاہد ڈرونز اور سیکڑوں بیلسٹک میزائلوں سے دفاع میں مشکلات پیش آ رہی ہیں، جبکہ گولہ بارود کی قلت کے باعث ایف-16 اور مگ طیاروں کے علاوہ سستے انٹرسیپٹر ڈرونز اور میزائل بھی تیار کیے جا رہے ہیں