سعودی و یمنی افواج نے حوثیوں کیخلاف فوجی کارروائی کا منصوبہ بنا لیا

سعودی عرب اور یمن کی مسلح افواج نے حوثی باغیوں کے خلاف مشترکہ اور وسیع پیمانے پر فوجی کارروائی کا تفصیلی منصوبہ تیار کر لیا ہے۔ غیر ملکی خبر ایجنسی کے مطابق اس عسکری منصوبے کے تحت باب المندب کے اسٹریٹجک علاقوں پر محدود کارروائیوں کے ساتھ ساتھ البیضا، مارب، تعز اور الجوف کے صوبوں میں مختلف محاذوں پر بڑے پیمانے پر حملے کیے جائیں گے۔

منصوبے کے مطابق سعودی عرب کی نگرانی میں ایک لاکھ سے زائد یمنی فوجی زمینی پیش قدمی کریں گے، جبکہ سعودی ایئر فورس فضائی حملوں سے ان کی پیش قدمی کو کور فراہم کرے گی۔ یہ آپریشن آنے والے چند ہفتوں میں شروع ہونے کی توقع ہے۔ اس کارروائی کا بنیادی مقصد باب المندب کی آبنائے اور بحیرہ احمر کے اہم ترین تجارتی بحری راستوں کا کنٹرول حوثیوں سے واپس حاصل کرنا ہے۔ امریکا اس مشن کے لیے پہلے ہی سعودی عرب کو اہم انٹیلی جنس معلومات فراہم کر رہا ہے، جبکہ یورپی اور علاقائی ممالک کی جانب سے دفاعی امداد فراہم کی جا رہی ہے، تاہم ان اتحاد یوں کے براہِ راست عسکری حصے دار بننے کی توقع نہیں ہے۔