مقبوضہ مغربی کنارے کا پورا علاقہ اسرائیل کا ہے، اتمار بن گویر

اسرائیل کے انتہائی دائیں بازو سے تعلق رکھنے والے انتہا پسند قومی سلامتی کے وزیر اتمار بن گویر نے اشتعال انگیز بیان دیتے ہوئے کہا ہے کہ مقبوضہ مغربی کنارے (ویسٹ بینک) کا پورا علاقہ اسرائیل کی ملکیت ہے۔ اسرائیلی میڈیا کی رپورٹس کے مطابق بن گویر نے عزم ظاہر کیا ہے کہ اگر وہ مستقبل میں وزیر دفاع کے عہدے پر فائز ہوتے ہیں تو وہ فلسطینی اتھارٹی کا مکمل خاتمہ کرنے اور وہاں مقیم فلسطینیوں کو جبراً دیگر علاقوں میں منتقل (ڈس پلیس) کرنے کے لیے تمام تر اقدامات کریں گے۔

انتہا پسند اسرائیلی وزیر کا مزید کہنا تھا کہ یہ تمام زمین مکمل طور پر اسرائیل کی ہے اور اگر انہیں وزارتِ دفاع کا قلمدان ملتا ہے تو وہ اس خطے پر کامل اسرائیلی تسلط قائم کرنے اور فلسطینیوں کے اخراج کے ایجنڈے پر پوری توجہ مرکوز کریں گے۔ ان کے اس بیان نے مقبوضہ عرب علاقوں میں تشویش اور عالمی برادری کی جانب سے شدید ردِعمل کو جنم دیا ہے۔