مشرقِ وسطیٰ کشیدگی، عالمی منڈی میں تیل کی قیمتوں میں 4 فیصد سے زائد اضافہ

امریکا کی جانب سے مشرق وسطیٰ کی کشیدہ صورتحال کے پیش نظر مزید عسکری قوت بھیجنے کی اطلاعات منظر عام پر آنے کے بعد عالمی منڈی میں خام تیل کی قیمتوں میں یکلخت 4 فیصد سے زائد کا بڑا اضافہ ہو گیا ہے۔ بین الاقوامی خبر رساں ایجنسی کے مطابق اس اچانک اضافے کے بعد برطانوی خام تیل (برینٹ کروڈ) کی قیمت بڑھ کر 102.31 ڈالر فی بیرل تک پہنچ گئی ہے، جبکہ امریکی خام تیل (WTI) کی قیمت 92.87 ڈالر فی بیرل پر بند ہوئی ہے۔

امریکی جریدے ‘وال اسٹریٹ جرنل’ کی ایک رپورٹ کے مطابق امریکا خطے میں مزید 10 ہزار فوجی تعینات کرنے کی تیاری کر رہا ہے، جس سے عالمی منڈی میں یہ تاثر پیدا ہوا ہے کہ ایران کے خلاف دوبارہ سے امریکی کارروائی کے امکانات اور تناؤ شدت اختیار کر گئے ہیں۔ مشرقِ وسطیٰ میں جنگی خدشات کے باعث ایندھن کی سپلائی میں رکاوٹ کے اندیشے سے بین الاقوامی مارکیٹ میں خام تیل کے نرخوں میں تیزی کا رجحان دیکھا جا رہا ہے۔