وزیر داخلہ سندھ نے ہندو تاجر کے قتل کے واقعہ کا نوٹس لے لیا

وزیرِ داخلہ سندھ ضیاء الحسن لنجار نے حیدرآباد میں ہندو تاجر نریش کمار کوہستانی کے قتل اور ان کی گولیاں لگی لاش ملنے کے افسوسناک واقعے کا فوری نوٹس لے لیا ہے۔ صوبائی وزیرِ داخلہ نے ڈی آئی جی حیدرآباد سے واقعے کی تفصیلی رپورٹ طلب کرتے ہوئے ہدایت کی ہے کہ کیس کی ہر پہلو سے مکمل، شفاف اور میرٹ پر تحقیقات کو یقینی بنایا جائے تاکہ ملوث ملزمان کو سخت سے سخت سزا دلوائی جا سکے۔

ضیاء الحسن لنجار نے پولیس حکام کو جائے وقوعہ سے سائنسی اور فرانزک شواہد محفوظ کرنے کی ہدایت دیتے ہوئے کہا کہ ملزمان کی سوراخ رساں ٹیموں کے ذریعے جلد از جلد گرفتاری کے لیے خصوصی تفتیشی اسکواڈ تشکیل دیے جائیں۔ انہوں نے کیس کی پیشرفت سے باقاعدگی سے آگاہ رکھنے کا حکم دیتے ہوئے عزم ظاہر کیا کہ ہندو تاجر کے قاتلوں کو قانون کے کٹہرے میں لانے کے لیے تمام تر دستیاب وسائل بروئے کار لائے جائیں گے۔