آزاد کشمیر میں گریڈ 16 سے 22 تک ملازمین کی فلاحی گرانٹ میں اضافہ

آزاد حکومتِ ریاست جموں و کشمیر نے سرکاری ملازمین کی فلاح و بہبود کے لیے اہم قدم اٹھاتے ہوئے بینولنٹ فنڈ کے قواعد میں ترمیم کا باقاعدہ نوٹیفکیشن جاری کر دیا ہے۔ محکمہ سروسز اینڈ جنرل ایڈمنسٹریشن کی جانب سے آزاد جموں و کشمیر ایمپلائز بینیوولنٹ فنڈ اینڈ گروپ انشورنس ایکٹ 1971 کی دفعہ 23 کے تحت کی جانے والی ان ترامیم کے مطابق گریڈ 16 سے 22 تک کے جریدہ (گزیٹڈ) ملازمین کے لیے الوداعی امداد اور ماہانہ فلاحی گرانٹ میں نمایاں اضافہ کر دیا گیا ہے۔

نئے قواعد و ضوابط کے تحت ہر جریدہ سرکاری ملازم اپنی بنیادی تنخواہ کا 2 فیصد حصہ ماہانہ فلاحی فنڈ میں جمع کرائے گا، جس کے لیے ماہانہ کٹوتی کی زیادہ سے زیادہ حد 2 ہزار روپے مقرر کی گئی ہے۔ ترمیم کی رو سے گریڈ 16 سے 22 کے ملازمین کو ریٹائرمنٹ کے وقت ایک بنیادی تنخواہ کے برابر الوداعی گرانٹ دی جائے گی، جس کے حقدار 60 سالہ کی عمر یا 25 سالہ قابلِ شمار ملازمت مکمل کرنے والے تمام ملازمین ہوں گے۔ اس کے علاوہ فلاحی فنڈ سے ملنے والی ماہانہ مالی امداد کی شرح میں بھی 20 فیصد اضافہ کر دیا گیا ہے۔