جماعت اسلامی کا 20 ستمبر کو اسلام آباد لانگ مارچ کا اعلان

جماعتِ اسلامی نے پٹرولیم مصنوعات پر عائد لیوی کے خاتمے اور عوامی ریلیف کے مطالبات کو تسلیم نہ کیے جانے پر 20 ستمبر کو وفاقی دارالحکومت اسلام آباد کی جانب لانگ مارچ کا باضابطہ اعلان کر دیا ہے۔ گوجرانوالہ میں ایک بڑے عوامی اجتماع سے خطاب کرتے ہوئے امیرِ جماعتِ اسلامی حافظ نعیم الرحمان نے حکومت کو خبردار کیا کہ وزیراعظم عوام کے غصے اور موڈ کا اندازہ لگائیں اور فوری طور پر پٹرولیم مصنوعات پر لیوی ختم کریں۔ انہوں نے متنبہ کیا کہ اگر حکومت نے اپنے فیصلے پر نظرِ ثانی نہ کی تو لانگ مارچ کو حکومت گراؤ تحریک میں تبدیل کر دیا جائے گا۔

حافظ نعیم الرحمان نے کہا کہ 25 کروڑ عوام کے حقوق کے لیے ملک کے چاروں اطراف سے لاکھوں افراد پر مشتمل عوامی سمندر اسلام آباد کی طرف مارچ کرے گا اور اب فیصلہ اسلام آباد کی سڑکوں پر ہی ہو گا۔ انہوں نے حکومت کے اس مؤقف کو رد کر دیا کہ وہ پٹرول کی قیمتیں کم کرنے میں مجبور ہے۔ امیر جماعتِ اسلامی کا کہنا تھا کہ پٹرولیم لیوی کا خاتمہ ہی حکومت کے پاس واحد راستہ ہے، بصورتِ دیگر عوام اپنے حقوق کے لیے پورا زور لگائیں گے۔