سعودی عرب پر حوثی حملوں کی شدید مذمت: اقوام متحدہ میں پاکستان کے مستقل مندوب سفیر عاصم افتخار کا سلامتی کونسل سے خطاب

اقوام متحدہ میں پاکستان کے مستقل مندوب سفیر عاصم افتخار احمد نے سلامتی کونسل (UNSC) کے ہنگامی اجلاس سے خطاب کرتے ہوئے سعودی عرب کے مختلف شہروں ابہا، خمیس مشیط، جازان اور نجران میں حوثیوں کی جانب سے شہری و اقتصادی اہداف پر کیے گئے حملوں کی شدید ترین الفاظ میں مذمت کی ہے۔ انہوں نے ان حملوں کو سعودی عرب کی خودمختاری اور علاقائی سالمیت کی صریح خلاف ورزی قرار دیتے ہوئے کہا کہ پاکستان مملکتِ سعودی عرب کی سلامتی، خوشحالی اور دفاع کے جائز حق کی مکمل و غیر متزلزل حمایت کرتا ہے۔

پاکستانی مندوب نے یمن کی نازک صورتِ حال پر تشویش کا اظہار کرتے ہوئے کہا کہ بحیرہ احمر میں تجارتی جہاز رانی پر حوثیوں کے مسلسل حملے اور خطے میں بڑھتی ہوئی عسکری کشیدگی پائیدار امن کی کوششوں کو شدید نقصان پہنچا رہی ہے۔ انہوں نے اقوام متحدہ کے اہلکاروں، انسانی امدادی کارکنوں اور سفارتی عملے کی حوثیوں کی جانب سے من مانی حراست کی سخت مذمت کرتے ہوئے ان کی فوری اور غیر مشروط رہائی کا مطالبہ کیا۔ عاصم افتخار احمد نے عالمی برادری اور سلامتی کونسل پر زور دیا کہ وہ یمن میں جاری انسانی بحران کے خاتمے، امدادی کارروائیوں کی مالی معاونت اور اقوام متحدہ کی سرپرستی میں جامع و پائیدار سیاسی تصفیے کے لیے متحد ہو کر کردار ادا کریں