پاکستان کی زینب خان کا عالمی اعزاز، کیوکوشین ورلڈ کراٹے چیمپئن شپ میں گولڈ میڈل جیت لیا

پاکستان کی زینب خان نے سعودی عرب کے دارالحکومت ریاض میں منعقد ہونے والی 5ویں کیوکوشین ورلڈ کراٹے چیمپئن شپ میں شاندار کارکردگی کا مظاہرہ کرتے ہوئے گولڈ میڈل جیت لیا اور ملک کا نام روشن کر دیا۔

تفصیلات کے مطابق زینب خان فل کنٹیکٹ کیوکوشین کراٹے کی تاریخ میں گولڈ میڈل حاصل کرنے والی پہلی پاکستانی خاتون بن گئی ہیں۔ اس عالمی چیمپئن شپ میں دنیا بھر کے 40 ممالک سے تعلق رکھنے والے 750 کھلاڑیوں نے شرکت کی۔

زینب خان کا تعلق پاکستان کیوکوشین کراٹے کے بانی مرحوم انعام اللہ خان کے خاندان سے ہے اور وہ انعام کیوکوشین کراٹے اکیڈمی میں مرحوم کے صاحبزادے ہدایت اللہ خان کی زیر نگرانی تربیت حاصل کر رہی ہیں۔

چیمپئن شپ میں پاکستان کی ٹیم 18 فائٹرز پر مشتمل تھی۔ مینز سینیئر 80 کلوگرام کی کیٹیگری میں انعام اللہ خان کے صاحبزادے ثنااللہ خان نے عراق کے ظہیر غائیب کے خلاف فائنل مقابلہ کیا اور سلور میڈل حاصل کیا، جبکہ 80 پلس کلوگرام کیٹیگری میں انعام اللہ خان کے بھتیجے سیف اللہ خان نے برانز میڈل جیتا۔

پاکستانی کھلاڑیوں کی اس شاندار کامیابی کو کھیلوں کے حلقوں میں سراہا جا رہا ہے اور اسے ملک کے لیے ایک بڑا اعزاز قرار دیا جا رہا ہے۔