حکومت کی 7 لاکھ 50 ہزار میٹرک ٹن گندم درآمد کرنے کی منظوری

اسلام آباد: وفاقی حکومت نے ملک میں گندم کے ذخائر مستحکم بنانے اور طلب و رسد کا گیپ پورا کرنے کے لیے 7 لاکھ 50 ہزار میٹرک ٹن گندم درآمد کرنے کی باقاعدہ منظوری دے دی ہے، جس کے بعد ٹریڈنگ کارپوریشن آف پاکستان (ٹی سی پی) نے بین الاقوامی ٹینڈر جاری کر دیا ہے۔

ٹی سی پی کے مطابق بین الاقوامی سپلائرز کی جانب سے کم از کم 50 ہزار میٹرک ٹن کی پیشکش ہی قابلِ قبول ہو گی جبکہ درآمدی گندم کی ترسیل کراچی اور گوادر کی بندرگاہوں پر سی ایف آر (CFR) کی بنیاد پر کی جائے گی۔ گندم کی خریداری کے لیے عالمی بولیاں 16 ستمبر تک موصول کی جائیں گی اور اسی روز تمام بولیاں کھولی جائیں گی۔ درآمد شدہ گندم کا بڑا حصہ صوبائی ضروریات کے مطابق تقسیم کیا جائے گا، جس کے تحت سندھ کو 3 لاکھ ٹن، پنجاب کو 2 لاکھ 50 ہزار ٹن اور خیبرپختونخوا کو 2 لاکھ ٹن گندم فراہم کی جائے گی۔

اقتصادی سروے 2025-26 کے جاری کردہ اعداد و شمار کے مطابق ملک میں گندم کی سالانہ کھپت تقریباً 3 کروڑ 13 لاکھ ٹن تک پہنچ چکی ہے، جبکہ گزشتہ مالی سال کے دوران گندم کی ملکی پیداوار 2 کروڑ 96 لاکھ 10 ہزار ٹن ریکارڈ کی گئی تھی، جس کے باعث سٹریٹیجک ذخائر قائم رکھنے کے لیے گندم کی نجی و سرکاری سطح پر درآمد ناگزیر ہو چکی ہے۔