اسلام آباد جوڈیشل سروس رولز 2011 میں ترمیم منظور، ججز کے تبادلوں کی راہ ہموار

اسلام آباد: اسلام آباد ہائیکورٹ کے چیف جسٹس نے انتظامی کمیٹی کی سفارش پر ’اسلام آباد جوڈیشل سروس رولز 2011‘ میں اہم ترمیم کی منظوری دے دی ہے، جس کے تحت ڈسٹرکٹ جوڈیشری کے ججز کے دیگر صوبوں میں تبادلوں کی راہ ہموار ہو گئی ہے۔

اس ترمیم کے ذریعے ڈسٹرکٹ جوڈیشری کے ججز کے تبادلوں اور تعیناتیوں کا اختیار مکمل طور پر اسلام آباد ہائیکورٹ کے انتظامی کنٹرول میں دے دیا گیا ہے۔ نئی گائیڈ لائنز کے تحت اسلام آباد کی ضلعی عدلیہ کے ججز کا روٹیشن پالیسی کے مطابق کسی بھی صوبائی ہائیکورٹ کے دائرہ اختیار میں آنے والی ڈسٹرکٹ جوڈیشری میں تبادلہ کیا جا سکے گا۔

اسلام آباد جوڈیشل سروس رولز 2011 میں اس ترمیم کا باضابطہ گزٹ نوٹیفکیشن جاری کر دیا گیا ہے۔ رجسٹرار اسلام آباد ہائیکورٹ نے ترمیم شدہ قواعد و ضوابط کی نقل باضابطہ طور پر اسلام آباد ہائیکورٹ بار ایسوسی ایشن اور ڈسٹرکٹ بار ایسوسی ایشن کے صدور کو ارسال کر دی ہیں تاکہ تمام متعلقہ فریقین کو آگاہ کیا جا سکے۔