اڈیالہ جیل کے 3 قیدیوں کا عمران خان جیسی طبی سہولیات کیلئے آئینی عدالت سے رجوع

اسلام آباد: اڈیالہ جیل کے تین قیدیوں نے بانی پی ٹی آئی عمران خان کی طرز پر طبی سہولیات اور بیرونِ ملک رابطوں کی اجازت حاصل کرنے کے لیے وفاقی آئینی عدالت سے رجوع کر لیا ہے، جس پر عدالت نے درخواستوں کو باضابطہ نمبر الاٹ کر دیے ہیں۔

قیدیوں نے اسلام آباد ہائیکورٹ کے فیصلے کے خلاف اپیلیں دائر کرتے ہوئے موقف اختیار کیا کہ آئین کا آرٹیکل 25 تمام شہریوں کو مساوی حقوق اور یکساں سلوک کی ضمانت دیتا ہے۔ درخواست گزاروں کے مطابق سپریم کورٹ نے 18 اگست کو بانی پی ٹی آئی کو علاج کے لیے شفا انٹرنیشنل اسپتال منتقل کرنے کا حکم دیا تھا، لہٰذا آئینی عدالت ان کا علاج بھی اسی اسپتال سے کرانے اور قانون کے تحت عمران خان کی طرح واٹس ایپ کے ذریعے بیرونِ ملک اہل خانہ سے بات کرانے کی اجازت دینے کا حکم جاری کرے۔

وفاقی آئینی عدالت کے ذرائع کے مطابق تینوں قیدیوں کی اپیلوں کو الگ الگ رجسٹر کرتے ہوئے اپیل نمبر 2050/2026، 2051/2026 اور 2052/2026 الاٹ کر دیے گئے ہیں، جن پر جلد ابتدائی سماعت متوقع ہے۔