جاپان سندھ میں سیلاب سے بچاؤ کیلیے 16.4 ملین ڈالر کی گرانٹ دے گا

پاکستان اور جاپان کے درمیان صوبہ سندھ میں سیلاب سے تحفظ کے منصوبے کے لیے 2.58 ارب جاپانی ین (تقریباً 16.4 ملین امریکی ڈالر) کا گرانٹ معاہدہ طے پا گیا ہے۔ وزارتِ اقتصادی امور کے مطابق اس منصوبے کا بنیادی مقصد سندھ میں سیلاب سے بچاؤ کے بنیادی ڈھانچے کو مضبوط بنانا اور قدرتی آفات سے دوچار مقامی آبادیوں کی نمٹنے کی صلاحیت میں اضافہ کرنا ہے۔ اس گرانٹ کے تحت لاڑکانہ میں دریائے سندھ کے دائیں کنارے پر واقع ‘اولڈ آباد بند’ کی بہتری اور استحکام کا کام انجام دیا جائے گا تاکہ علاقے کو ممکنہ سیلابی خطرات سے محفوظ بنایا جا سکے۔

اس موقع پر ‘ایکسچینج آف نوٹس’ اور ‘ریکارڈ آف ڈسکشن’ پر سیکرٹری اقتصادی امور محمد حمیر کریم اور جاپانی سفیر اکاماتسو شوئچی نے دستخط کیے، جبکہ گرانٹ معاہدے پر ایڈیشنل سیکرٹری اقتصادی امور سبینہ قریشی اور جاپان انٹرنیشنل کوآپریشن ایجنسی (JICA) کے سینئر نمائندے سوگاوارا تاکایوکی نے دستخط کیے۔ سیکرٹری اقتصادی امور نے جاپان کو پاکستان کا دیرینہ اور قابلِ قدر ترقیاتی شراکت دار قرار دیتے ہوئے اس کی مسلسل اور فراخدلانہ معاونت کو سراہا۔ جاپانی سفیر اکاماتسو شوئچی نے اس عزم کا اعادہ کیا کہ جاپان، پاکستان کے ساتھ اپنے دوستانہ تعلقات اور دوطرفہ تعاون کو مزید مضبوط بناتا رہے گا۔