پاکستان چاروں صوبوں کے ساتھ ہمیشہ قائم و دائم رہے گا: وزیراعلیٰ سندھ

کراچی: وزیراعلیٰ سندھ سید مراد علی شاہ نے ‘سلام کراچی فیسٹیول’ کی اختتامی تقریب سے خطاب کرتے ہوئے کہا ہے کہ پاکستان اپنے چاروں صوبوں کے ساتھ ہمیشہ قائم و دائم رہے گا اور کراچی نے ہر دور میں ملک کی قیادت اور رہنمائی کی ہے۔

فیسٹیول کے منتظمین کو کامیاب انعقاد پر مبارکباد دیتے ہوئے مراد علی شاہ نے کہا کہ کراچی محض روشنیوں کا شہر نہیں بلکہ زندہ دل لوگوں کا مسکن ہے۔ انہوں نے دعویٰ کیا کہ سندھ واحد صوبہ ہے جہاں مکمل اور فعال بلدیاتی نظام موجود ہے اور کے ایم سی (بلدیہ عظمیٰ کراچی) شہر کی تعمیر و ترقی کے لیے ہر ممکن اقدامات کر رہی ہے۔

اپنی تقریر کے دوران وزیراعلیٰ سندھ نے ملکی دفاع اور سفارتی کامیابیوں کا ذکر کرتے ہوئے کہا کہ ہمارے آباؤ اجداد کی قربانیوں سے یہ ملک وجود میں آیا، اور ہماری مسلح افواج نے بھارت کے خلاف ہر محاذ پر جرات مندانہ دفاع کیا ہے۔ انہوں نے مزید کہا کہ سفارتی محاذ پر بلاول بھٹو زرداری نے بطور وزیرِ خارجہ بہترین خدمات انجام دیں۔ مراد علی شاہ نے واضح کیا کہ ملک یا صوبے کے خلاف معاندانہ نظر رکھنے والوں کو آصف علی زرداری اور بلاول بھٹو کے کارکناں اور سپاہی اسی طرح دندان شکن جواب دیں گے جیسا ماضی میں دیا جاتا رہا ہے۔