بھارت میں قدیم مسجد مسمار: پاکستان کا شدید احتجاج، عالمی برادری سے نوٹس کا مطالبہ

پاکستان نے بھارت میں 100 سال سے زائد قدیم تاریخی مسجد کی مسماری کی شدید الفاظ میں مذمت کرتے ہوئے عالمی برادری سے بھارت میں ریاستی سرپرستی میں اقلیتوں، بالخصوص مسلمانوں کی عبادت گاہوں کی مسلسل بے حرمتی اور انہدام کا فوری نوٹس لینے کا مطالبہ کیا ہے۔ دفتر خارجہ کے ترجمان نے اپنے جاری بیان میں کہا کہ تاریخی اسلامی عمارت کے خلاف یہ قابلِ مذمت اقدام اسلامی ورثے اور شناخت کو مٹانے کے لیے جاری وسیع تر اسلاموفوبک اور ہندوتوا نظریے کا ایک اور کھلا مظہر ہے۔

ترجمان دفتر خارجہ نے مزید کہا کہ تاریخی بابری مسجد کی مسماری آج بھی بھارت میں مذہبی عدم برداشت، تعصب اور اقلیت دشمن پالیسیوں کی واضح یاد دہانی کراتی ہے۔ انہوں نے زور دیا کہ عالمی برادری کو چاہیے کہ وہ بھارتی حکام کو تمام اقلیتوں، بالخصوص مسلم برادری کی بنیادی مذہبی آزادیوں، بنیادی حقوق اور ثقافتی ورثے کے خلاف کی جانے والی ان خلاف ورزیوں پر جواب دہ ٹھہرائے۔