کوٹری سٹیشن پر مال بردار ٹرین حادثے کا شکار ، ایک ریلوے ملازم جاں بحق

سندھ میں کوٹری ریلوے اسٹیشن کے قریب کوئلے سے لدھی مال بردار ٹرین خوفناک حادثے کا شکار ہو گئی، جس کے نتیجے میں اپ مین ٹریک پر ٹرین کی پانچ بوگیاں پٹڑی سے اتر گئیں اور ایک ریلوے ملازم جاں بحق ہو گیا۔ ریلوے حکام کے مطابق جاں بحق ہونے والا ملازم کوٹری سے حیدرآباد جانے کے لیے اس مال گاڑی میں سوار ہوا تھا۔ حادثے کی شدت سے ہزاروں ٹن کوئلہ ضائع ہو گیا جبکہ ریلوے ٹریک کو شدید نقصان پہنچا اور کئی فٹ لمبی پٹڑی اکھڑ گئی۔ حادثے کے بعد اپ ٹریک پر تمام ٹرینوں کی آمدورفت معطل ہو گئی ہے، جبکہ ریلوے کے انتظامی عملے اور امدادی ٹیموں نے بھاری مشینری کے ساتھ موقع پر پہنچ کر متاثرہ ٹریک کی بحالی اور مرمت کا کام شروع کر دیا ہے