6 ستمبر کا دن یاد دلاتا ہے کہ قوم متحد ہو تو کوئی طاقت شکست نہیں دے سکتی: صدر زرداری

صدر مملکت آصف علی زرداری نے یومِ دفاع و شہدا کے موقع پر اپنے خصوصی پیغام میں کہا ہے کہ 6 ستمبر ہماری قومی تاریخ میں ایک یادگار مقام رکھتا ہے جو اس بات کا ثبوت ہے کہ جب قوم متحد ہو تو دنیا کی کوئی طاقت اسے شکست نہیں دے سکتی۔ انہوں نے 1965ء کی جنگ کے شہدا، غازیوں اور ان کے اہلخانہ کو قوم کی جانب سے سلام پیش کرتے ہوئے کہا کہ ہمارے شہدا کی لازوال قربانیاں آنے والی نسلوں کے لیے مشعلِ راہ ہیں۔ صدر زرداری نے واضح کیا کہ 6 ستمبر کا وہی تاریخی جذبہ اور اتحاد ‘آپریشن بنیان مرصوص’ اور معرکہ حق میں بھی نمایاں ہوا، جس نے ہماری عسکری تاریخ میں ایک اور سنہرا باب رقم کیا ہے۔ انہوں نے ‘مکہ معاہدے’ کو علاقائی امن اور اجتماعی سلامتی کے لیے پاکستان کے بڑھتے ہوئے کردار کا مظہر قرار دیتے ہوئے کہا کہ ملکی خودمختاری اور قومی سلامتی پر کوئی سمجھوتہ نہیں کیا جائے گا۔ صدر مملکت نے مسئلہ کشمیر کے منصفانہ حل پر زور دیا اور انکشاف کیا کہ بھارت اور طالبان رجیم کا گٹھ جوڑ اب کوئی راز نہیں رہا، جبکہ فتنہ الخوارج اور فتنہ الہندوستان کو بیرونی سرپرستی حاصل ہے۔ انہوں نے کہا کہ مضبوط دفاع کے ساتھ معاشی استحکام اور سیاسی رواداری ہی ملکی طاقت کی بنیادی اساس ہیں۔