عوام نے ثابت کردیا، میر پور خاص عمران خان کا قلعہ ہے: سہیل آفریدی

وزیراعلیٰ خیبرپختونخوا سہیل آفریدی نے سندھ کے علاقے میرپورخاص کے پوسٹ آفس چوک میں ایک بڑے عوامی اجتماع سے خطاب کرتے ہوئے کہا ہے کہ میرپورخاص کے غیور اور بہادر عوام نے ثابت کر دیا ہے کہ یہ شہر بانی پی ٹی آئی کا قلعہ ہے۔ اس موقع پر پی ٹی آئی رہنما حلیم عادل شیخ، زین شاہ اور دیگر قیادت بھی ان کے ہمراہ موجود تھی۔ سہیل آفریدی نے اپنے خطاب میں کہا کہ بانی پی ٹی آئی عوام کے لیے تین سال کی غیر قانونی قید کاٹ رہے ہیں مگر آج بھی اپنے مؤقف پر ڈٹ کر کھڑے ہیں۔ انہوں نے دعویٰ کیا کہ سندھ کے دورے نے واضح کر دیا ہے کہ وہاں کے عوام کا فیصلہ کس کے ساتھ ہے، جبکہ عدلیہ کی توقیر اور ملک کو چوروں و ڈاکوؤں سے بچانے کے لیے 27 ستمبر کا احتجاج انتہائی ضروری ہو چکا ہے۔ وزیراعلیٰ کے پی نے نوجوانوں پر زور دیا کہ وہ ملک کے مستقبل اور وقار کی خاطر اپنا فعال کردار ادا کریں اور 27 ستمبر کو باہر نکلیں تاکہ قوم اپنے فیصلے خود کر سکے۔