آئی پی یو یوتھ کانفرنس کی سربراہی پاکستان کو مل گئی، سینیٹر آغا شاہ زیب صدر منتخب

سمرقند میں منعقدہ بین الاقوامی پارلیمانی یونین (آئی پی یو) کی یوتھ کانفرنس کی سربراہی کا اعزاز پاکستان کو مل گیا ہے، جہاں پاکستان کے سینیٹر آغا شاہ زیب درانی نے اس عالمی تقریب کی صدارت کی۔ اس اہم کانفرنس میں دنیا بھر کے 75 سے زائد ممالک کے نوجوان پارلیمنٹرینز نے شرکت کی اور نوجوانوں کو درپیش چیلنجز اور ان کے حل پر تفصیلی گفتگو کی۔ کانفرنس سے اپنے خطاب میں صدر آئی پی یو یوتھ کانفرنس سینیٹر آغا شاہ زیب درانی نے پارلیمانی نظام اور پالیسی سازی کے عمل میں نوجوان قیادت کی اشد ضرورت پر زور دیا۔ انہوں نے کہا کہ جدید تقاضوں اور بدلتے ہوئے عالمی حالات کے مطابق مؤثر قانون سازی کے لیے نوجوانوں کی فعال سیاسی شرکت ناگزیر ہو چکی ہے۔ سینیٹر درانی نے تمام ممالک کے نوجوان پارلیمنٹرینز پر زور دیا کہ وہ درپیش مسائل سے نمٹنے کے لیے مشترکہ حکمت عملی اختیار کریں اور فیصلہ سازی کے عمل میں نوجوانوں کے لیے زیادہ سے زیادہ مواقع پیدا کیے جائیں تاکہ عالمی سطح پر پارلیمانی نظام کو عصرِ حاضر کے تقاضوں سے ہم آہنگ کیا جا سکے۔