نئے صوبوں کا معاملہ محاذ آرائی نہیں، مشاورت سے حل ہونا چاہیے: چودھری شجاعت

لاہور: پاکستان مسلم لیگ کے صدر چودھری شجاعت حسین نے نئے صوبوں کے قیام اور انتظامی اصلاحات کے معاملے کو سیاسی محاذ آرائی سے نکال کر باہمی قومی مشاورت اور اتفاقِ رائے سے حل کرنے پر زور دیا ہے۔

میڈیا سے گفتگو کرتے ہوئے چودھry شجاعت حسین نے کہا کہ نئے صوبوں کا قیام کسی ایک سیاسی جماعت، گروہ یا علاقے کا مسئلہ نہیں بلکہ اس کا براہِ راست تعلق عوام کی سہولت، بہتر طرزِ حکمرانی اور ملک کے مستقبل سے ہے۔ انہوں نے کہا کہ اس حساس معاملے پر فیصلے سیاسی مفادات یا نعروں کے بجائے زمینی حقائق اور عوامی ضروریات کو مدنظر رکھ کر کیے جانے چاہئیں۔ اگر نئے صوبوں سے انتظامی امور بہتر اور مسائل دہلیز پر حل ہوتے ہیں تو اس تجویز پر کھلے دل سے غور ہونا چاہیے۔

صدر پاکستان مسلم لیگ نے انتظامی یونٹس کو مضبوط اور بااختیار بنانے کی تجویز دیتے ہوئے کہا کہ ہر ڈویژن کو مؤثر انتظامی یونٹ بنا کر اختیارات اور وسائل نچلی سطح تک منتقل کیے جائیں تاکہ عام آدمی کے مسائل جلدی حل ہوں۔ انہوں نے تمام سیاسی جماعتوں پر زور دیا کہ وہ ایک میز پر بیٹھ کر آئینی و انتظامی ماہرین کی مشاورت سے ایسا قابلِ عمل نظام تشکیل دیں جس سے ملک مضبوط اور عوام کو فوری انصاف و بنیادی سہولیات میسر آ سکیں۔