زمان پارک کے باہر پولیس پر حملہ کیس، فلک جاوید کی ضمانت منظور

لاہور: انسدادِ دہشتگردی عدالت (ATC) نے زمان پارک کے باہر پولیس اہلکاروں پر حملے کے کیس میں پاکستان تحریک انصاف کی متحرک کارکن فلک جاوید کی بعد از گرفتاری ضمانت منظور کر لی ہے۔

انسدادِ دہشتگردی عدالت کے جج ملک عابد حسین نے کیس کی سماعت کی، جہاں فلک جاوید کی جانب سے نامور قانون دان بیرسٹر میاں علی اشفاق نے عدالت میں تفصیلی اور حتمی دلائل پیش کیے۔ پراسیکیوشن کی جانب سے ملزمہ کی ضمانت کی شدید مخالفت کی گئی، تاہم عدالت نے دفاعی وکیل کے دلائل سے اتفاق کرتے ہوئے فلک جاوید کی ضمانت منظور کرنے کا حکم سنایا۔

واضح رہے کہ فلک جاوید کے خلاف تھانہ ریس کورس میں پولیس پر حملہ، کارِ سرکار میں مداخلت اور دیگر سنگین دفعات کے تحت مقدمہ درج کیا گیا تھا۔ وکلاء کے مطابق زمان پارک کیس میں ضمانت منظور ہونے کے باوجود فلک جاوید جیل میں ہی رہیں گی، کیونکہ وہ 9 مئی کے دیگر سیاسی و امن و امان کے مقدمات میں تاحال جوڈیشل ریمانڈ پر جیل میں قید ہیں۔