پیٹرولیم لیوی ختم کی جائے، روٹی 10 روپے کی ہو: امیر جماعت اسلامی حافظ نعیم الرحمٰن کی پریس کانفرنس

اسلام آباد: امیر جماعت اسلامی حافظ نعیم الرحمٰن نے مطالبہ کیا ہے کہ حکومت عوام کو فوری ریلیف دیتے ہوئے روٹی کی قیمت 10 روپے مقرر کرے اور عالمی منڈی میں خام تیل کی قیمتوں کے مطابق پیٹرولیم لیوی کا بوجھ ختم کرے۔

اسلام آباد میں پریس کانفرنس کرتے ہوئے امیر جماعت اسلامی نے کہا کہ جماعت اسلامی کے ملک گیر پرامن دھرنوں اور احتجاجی تحریک کا آج 21 واں روز ہے، اور 3 ستمبر کی کامیاب شٹر ڈاؤن ہڑتال پر عوام کا ردِعمل زبردست تھا۔ انہوں نے کہا کہ روزانہ کی بنیاد پر دھرنے دینا آسان کام نہیں، تاہم جماعت اسلامی کی جدوجہد کی وجہ سے ہی حکومت پیٹرول کی قیمتوں میں مزید بے تحاشا اضافہ نہیں کر سکی۔ ان کا کہنا تھا کہ ایف بی آر اور بیوروکریسی کی نااہلی اور عیاشیوں کا بوجھ غریب عوام پر ٹیکسوں کی صورت میں ڈالا جا رہا ہے، جبکہ ملکی بینکوں کو فائدہ پہنچانے کے لیے عوام کا استحصال کیا جا رہا ہے۔

حافظ نعیم الرحمٰن نے انکشاف کیا کہ حکومت نے جماعت اسلامی سے باقاعدہ رابطہ کر لیا ہے اور پیر کے روز سے فریقین کے درمیان باضابطہ مذاکرات کا آغاز ہو گا۔ انہوں نے عزم ظاہر کیا کہ جماعت اسلامی کی تحریک عوامی مسائل کے حل کے لیے شروع کی گئی ہے اور انہیں کامل یقین ہے کہ وہ عوام کے لیے بجلی، پیٹرول اور بنیادی اشیائے ضروریہ کی قیمتوں میں نمایاں ریلیف حاصل کرنے میں کامیاب ہو جائیں گے۔