محکمہ موسمیات کی بالائی پنجاب، اسلام آباد اور خیبر پختونخوا میں شدید بارش کی پیشگوئی

اسلام آباد: محکمہ موسمیات نے اسلام آباد، بالائی پنجاب، خیبر پختونخوا، کشمیر اور گلگت بلتستان میں تیز ہواؤں اور گرج چمک کے ساتھ شدید سے انتہائی شدید بارشوں کی پیش گوئی کرتے ہوئے متعلقہ اداروں اور شہریوں کو اربن فلڈنگ کی ہدایت جاری کر دی ہے۔

فلڈ فورکاسٹنگ ڈویژن کے مطابق 5 ستمبر تک بالائی علاقوں اور دریاؤں کے بالائی کیچ منٹ علاقوں میں بارشوں کا سلسلہ جاری رہے گا، جبکہ 6 ستمبر سے مون سون کی سرگرمیوں میں تدریجی کمی واقع ہوگی۔ راولپنڈی، اسلام آباد، جہلم، گجرات، گوجرانوالہ، سیالکوٹ اور نارووال کے نشیبی علاقوں میں پانی جمع ہونے اور اربن فلڈنگ کا شدید خدشہ ہے، جبکہ خیبر پختونخوا کے ندی نالوں اور دریائے کابل سے ملحقہ علاقوں میں طغیانی کا امکان ظاہر کیا گیا ہے۔

محکمہ موسمیات کے مطابق تربیلا ڈیم اس وقت اپنی زیادہ سے زیادہ حفاظتی سطح تک بھر چکا ہے جبکہ منگلا ڈیم کی سطح 78 فیصد تک پہنچ گئی ہے۔ دریائے سندھ کے مختلف مقامات پر نچلے درجے کا سیلاب موجود ہے، اور اگلے 24 سے 36 گھنٹوں کے دوران سندھ، جہلم، چناب اور راوی کے بہاؤ میں معمولی اضافے کا امکان ہے۔ حکام نے شہریوں کو ندی نالوں کے قریب جانے سے گریز کرنے اور بارش کے دوران محتاط رہنے کی سخت تاکید کی ہے۔