اسحاق ڈار کی زیر صدارت اجلاس، حالیہ سفارتی سرگرمیوں اور آئندہ ترجیحات کا جائزہ

اسلام آباد: نائب وزیراعظم و وزیر خارجہ سنیرین اسحاق ڈار کی زیر صدارت وزارت خارجہ میں ایک اعلیٰ سطح کا جائزہ اجلاس منعقد ہوا، جس میں ملک کی حالیہ سفارتی سرگرمیوں اور عالمی سطح پر طے پانے والے معاہدوں پر پیش رفت کا تفصیلی احاطہ کیا گیا۔

اجلاس کے دوران نائب وزیراعظم کے حالیہ غیر ملکی دوروں کے دوران طے پانے والی یادداشتوں اور سمجھوتوں پر عمل درآمد کا جائزہ لیا گیا۔ اس کے علاوہ پاکستان کی خارجہ پالیسی کی بنیادی ترجیحات، عالمی برادری کے ساتھ حالیہ سفارتی رابطوں کے مثبت نتائج اور آنے والے دنوں میں طے شدہ سفارتی سرگرمیوں کے ایجنڈے پر بھی غور کیا گیا۔

نائب وزیراعظم اسحاق ڈار نے متعلقہ حکام اور تمام ڈیسکس کو ہدایت کی کہ وہ قومی مفادات سے متعلق تمام تر ترجیحی امور پر مؤثر رابطہ کاری اور باقاعدہ فالو اَپ (Follow-up) کو یقینی بنائیں۔ اجلاس میں سیکرٹری خارجہ آمنہ بلوچ، ایڈیشنل سیکرٹری خارجہ برائے اقوام متحدہ نبیل منیر سمیت وزارتِ خارجہ کے دیگر سینئر حکام نے شرکت کی۔