سرکاری سکولوں میں سبزیوں کی کاشت یقینی بنانے کی ہدایت

ضلع مظفرگڑھ کے سرکاری اساتذہ کو تعلیم کی فراہمی کے ساتھ ساتھ اب اسکولوں میں سبزیاں اگانے کی ذمہ داری بھی سونپ دی گئی ہے۔ ڈسٹرکٹ ایجوکیشن آفیسر سیکنڈری کی جانب سے تمام اسکول سربراہان کو سخت ہدایات پر مبنی ایک مراسلہ جاری کیا گیا ہے، جس میں اسکولوں کے خالی پلاٹوں پر موسمی سبزیوں کی کاشت، دیکھ بھال اور نگہداشت یقینی بنانے کے لیے ہر اسکول میں ذمہ دار فرد مقرر کرنے کی ہدایت کی گئی ہے۔ مراسلے کے مطابق اسکولوں کو روزانہ کی بنیاد پر سبزیوں کی دیکھ بھال کی تصاویر واٹس ایپ گروپس میں شیئر کرنا ہوں گی اور عدم اطمینان کی صورت میں دوبارہ کاشت کرنا پڑے گی۔ واضح رہے کہ یہ اقدام ضلعی انتظامیہ کے ’سانجھی سبزی پراجیکٹ‘ کے تحت کیا گیا ہے، جس کا مقصد سرکاری اداروں کی زمینوں پر سبزیاں اگا کر مقامی شہریوں میں مفت تقسیم کرنا ہے۔