مومنہ اقبال و ثاقب چڈھر کیس: نئے ڈیجیٹل شواہد پر دوبارہ نوٹس جاری، ازسرنو تحقیقات کے لیے خصوصی ٹیم تشکیل

معروف اداکارہ مومنہ اقبال اور مسلم لیگ (ن) کے رکن پنجاب اسمبلی ثاقب چڈھر ہراسانی کیس میں اہم پیش رفت سامنے آئی ہے، جہاں نئے ڈیجیٹل شواہد سامنے آنے پر نیشنل سائبر کرائم انویسٹی گیشن ایجنسی (NCCIA) نے دونوں فریقین کو دوبارہ نوٹس جاری کر دیے ہیں۔ ترجمان این سی سی آئی اے کے مطابق معاملے کی ازسرِ نو تحقیقات کے لیے ایک ڈپٹی ڈائریکٹر کی سربراہی میں خصوصی تحقیقاتی ٹیم تشکیل دے دی گئی ہے، جو نئے ڈیجیٹل شواہد، سابقہ ریکارڈ اور دیگر متعلقہ معلومات کا تفصیلی جائزہ لے گی۔ خصوصی ٹیم ایک ماہ کے اندر اپنی تحقیقات مکمل کر کے جامع رپورٹ ڈی جی این سی سی آئی اے کو پیش کرے گی، جس کی روشنی میں آئندہ کی قانونی کارروائی کا فیصلہ کیا جائے گا۔ ترجمان نے مزید واضح کیا ہے کہ تحقیقات کی مکمل منتقلی تک کسی بھی فرد کو بے گناہ یا گنہگار قرار دینا قبل از وقت ہو گا۔