پاکستان امن عمل سے مایوس نہیں، فریقین مذاکرات کی طرف واپس آئیں گے: دفتر خارجہ

ترجمان دفتر خارجہ طاہر حسین اندرابی نے ہفتہ وار پریس بریفنگ کے دوران کہا ہے کہ اسلام آباد مفاہمتی یادداشت (MoU) کو مردہ یا غیر مؤثر قرار دینے کا سوال ہی پیدا نہیں ہوتا، امن کا فریم ورک موجود ہے اور پاکستان کو امید ہے کہ فریقین بالآخر مذاکرات کی طرف لوٹیں گے۔ امریکا اور ایران کے درمیان کشیدگی پر تشویش کا اظہار کرتے ہوئے انہوں نے کہا کہ موجودہ حالات کو پاکستان کی ثالثی کی کوششوں ناکامی قرار نہیں دیا جا سکتا۔ دوسری جانب بھارت کی طرف سے ثالثی عدالت کا فیصلہ مسترد کرنے کے حوالے سے ترجمان نے واضح کیا کہ اس اقدام سے سندھ طاس معاہدے کے تحت بھارت کی بین الاقوامی ذمہ داریاں ختم نہیں ہوتیں اور اسے ہر حال میں معاہدے کی پاسداری کرنا ہو گی۔ انہوں نے متنبہ کیا کہ جنوبی ایشیا میں پانی کے انتظام پر یکطرفہ طرزِ عمل خطے کے امن کے لیے نقصان دہ ہے اور پاکستان اپنے آبی حقوق و قومی مفادات کے تحفظ کے لیے تمام ضروری اقدامات کا حق رکھتا ہے۔