بانی پی ٹی آئی کو جیل میں تمام سہولیات دی جا رہی ہیں: عقیل ملک

وزیر مملکت برائے قانون و انصاف بیرسٹر عقیل ملک نے کہا ہے کہ بانی پی ٹی آئی کو جیل میں تمام بنیادی و قانونی سہولیات فراہم کی جا رہی ہیں اور ان کی فیملی سمیت بشریٰ بی بی سے باقاعدگی سے ملاقاتیں ہو رہی ہیں۔ ایک ٹی وی پروگرام میں گفتگو کرتے ہوئے عقیل ملک نے انکشاف کیا کہ گزشتہ ہفتے بانی پی ٹی آئی کی اپنے بیٹوں سے رابطہ قائم کرنے کی دو بار کوشش کی گئی تاہم دوسری جانب سے کوئی جواب نہیں ملا، جبکہ نورین نیازی اور ڈاکٹر عظمیٰ بھی ان سے ملاقات کر چکی ہیں۔ انہوں نے مزید بتایا کہ سلمان صفدر نے خود جیل جا کر تمام حالات کا جائزہ لے کر رپورٹ پیش کی ہے جہاں بانی کے پاس سات کمروں کا کمپاؤنڈ موجود ہے، تاہم جیل میں عام قیدیوں کی آمد و رفت یا کسی قسم کی سیاسی سرگرمی کی اجازت نہیں دی جا سکتی۔