این ڈی ایم اے کا گلگت بلتستان، خیبرپختونخوا اور آزاد کشمیر میں ممکنہ سیلاب کا الرٹ

نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے بڑھتے درجہ حرارت اور مون سون بارشوں کے پیشِ نظر گلگت بلتستان، خیبرپختونخوا اور آزاد کشمیر میں گلیشیائی جھیلوں کے پھٹنے (GLOF)، اچانک سیلاب اور لینڈ سلائیڈنگ کا الرٹ جاری کر دیا ہے۔ این ڈی ایم اے کے مطابق گلیشیئرز تیزی سے پگھلنے کے باعث غذر، ہنزہ، نگر، سکردو، چترال، سوات، نیلم اور مانسہرہ سمیت متعدد بالائی علاقوں کو انتہائی حساس قرار دیا گیا ہے۔ اس کے علاوہ 2 سے 5 ستمبر کے دوران اسلام آباد، راولپنڈی، پوٹھوہار اور بالائی خیبرپختونخوا میں موسلادھار بارشوں کے باعث شہری علاقوں میں اربن فلڈنگ اور پہاڑی راستوں پر لینڈ سلائیڈنگ کا خدشہ ظاہر کیا گیا ہے۔ اتھارٹی نے مقامی انتظامیہ کو ہنگامی انتظامات مکمل رکھنے جبکہ شہریوں اور سیاحوں کو ندی نالوں سے دور رہنے اور غیر ضروری سفر سے گریز کی ہدایت کی ہے۔